يعنى ايه Ultras White Knights ؟؟؟

السلام عليكم ,
هنوضح هنا بعض حاجات غالبا ما يستفسر عنهم الجمهور غلى صيغة أسئلة , يلا بسم الله ,
_ يعنى إيه الترا وايه أهميتها ؟؟؟
_ إحنا مجموعة أشخاص من مختلف مناطق الجمهورية إتجمعنا على حب النادى بتاعنا و الموضوع إتطور معانا لدرجة إنه بقى هو وطنا وكل همنا فى الحياة إنه يعلى ويتعملو ألف حساب .

_ إيه الأغانى الصعبة اللى إنتو بتغنوها دى يا عم ماتمشوها أرديحى و الزمالك أحسن ناس ؟
_ بفرض إن الأغانى صعبة , هنلاقى فيها ميزة عمرها ماكانت موجودة فى الملاعب المصرية وهى التكرار بدون ملل , الأغانى دى تحمسك اولا ف اتروح انت محمس اللى جنبك فالجمهور كله ينحمس فتلاقى الفرقة كلها اتحمست و إبتدى اللعب يحلو , و حقيقة الأغانى دى مش صعبة و هو كل الموضوع إن نغمتها بس مش مألوفة أوى فى الملاعب هنا لكن بمجرد إن انت تركز فى اللى بيتقال, تتقال مرتين و تكون حافظها صم .

_ طب إنتوا ليه ماتعدوش تانية حتى هناك تعرفوا تشوفوا المتش أحسن و تتحمسوا أكتر ؟
_ بداية إحنا مؤمنين جدا بالتخصص كل إنسان و ليه دور لازم يأدية و يلتزم بيه , اول حاجة لازم تسأل نفسك سؤال أنا موجود فى الإستاد بعمل إيه ؟ جاى أتفرج على الماتش ؟ اكيد لأ التلفزيون صورته أحلى 100 مرة وفى تحليل قيلية و فى تحليل بعديه و مظبطنا , يبقى أنت اكيد رايح عشان تساند فريقك , يا ترى قعادك فى الإستاد و انت ساكت هيفيد فريقك ؟؟ أبدا!!
اصلها مش خناقة اللعيبة تنزل تلاقى ناس كتير قاعدة فايطمنوا , اللعيبة دى لازم تتحمس , و بم إن الكلام اللى فات لسة ثقافتة مش منتشرة فى مصر , فهنلاقى إن التالته بتتميز ان الرؤية فيها صعبة , فأغلب الناس بتقول ادام انا مش شايف حاجة يبقى أشجع , و هو دة المطلوب تشجيع وبس عشان الإستاد مكان للتشجيع فقط لا غير .

_ طب أنا إزاى أنضملكوا ؟؟
_ الالترا ده احساس جواك بتتولد بى او بتكتسبوا .....لكن مش حوار تنضم و مش تنضم , تعالى المدرج شجع فريقك 90 دقيقة ....غنى 90 دقيقة....ورينا بتحب النادى اد ايه......ولع و متخفش غير من اللى خلقك, خليك ورا فريقك فى كل حته و تحت اى ظروف......سافر وراها اى مكان, تعالى و اقعد معانا حاول تتكلم معانا حسسنا ان انت أخونا , بس كدة , خلاص انت بقيت واحد منا .

_ بس إنتوا مبتظهروش غير فى الدخلات و مش دى المعضلة يعنى ؟
_ مين قالك فى متشات كتير كان لينا دور فى نجاح الفريق فيها , فاكرين الحداد اللى كنا عاملينه , طب فاكرين ماتش اسمنت السويس لما سخنا الشوط التانى والفرقة بعد ما كانت متأخرة بهدف جابت 4 إجوان ,, ده غير إن الدخلات اللى إحنا بنعملها مش بنعملها عشان تخلى منظرنا حلو وبس لأ دى فيها رسالة و رسالة مهمة كمان , وعلى فكرة الدخلات دى فى ناس مابتروحش إمتحانتها عشان تخلصها , ده هو زمالك واحد يا جماعة مين هايحبه قدنا ؟ .

_ بس إنتوا بتبقوا قليلين اوى فى المتشات العادية اللى بنلاعب فيها فرق تعبانة , دة من إيه ؟
_ بداية كل المتشات مهمة , و إحنا كلنا بنبقى حريصين على ال 5 جنية حق التذكرة عشان دى راجعة للنادى بتاعنا و هيطور بيها نفسه , ثانيا إحنا كأعضاء الوايت نايتس بنبقى كلنا متواجدين بس الجمهور هو اللى بيبقى قليل , و فى أحيان كتيير الفرقة بتنام بسبب الموضوع دة .

_ يعم ده انتوا بتوع مشاكل و خناقات و بتاع , لا يعم انا أوت , مش كدة ولا إية ؟
_ مش كدة طبعا , من أهم ميزات الألترا انا أعضائها بيتحلو بأخلاق الفرسان , ما يهاجموش إلا لما حد يجى عليهم , و لما يمسكوا واحد من الأعداء لوحدة بيسبوة , و اى إنسان مهما كان هيدافع عن نفسه فى حالة الهجوم عليه , ود بالظبط اللى إحنا بنعمله , دفاع عن النفس .

_ طب أنا مش هاقدر أنضملكوا بسبب ظروف ايا كانت , يا ترى ممكن أساعدكم إزاى ؟
_ بداية طبعا الدعم المادى ده مهم جدا لو كنت قادر ماديا , غير كدة انت ممكن تكون فى حد نفسك مجموعة ألترا لوحدك , روح الإستاد إتشقلب معانا , غمض عنيك و انت بتشجع , ولع شمروخ , غنى بأعلى صوتك , ساعدنا فى تنظيم الدخلة , زق اللى قدامك لو سكت عن التشجيع , ارفع صنارة , هات كوفية معاك وانت جاى الإستاد , شاغب مع الأمن لو حسيت إن الدخلة فى خطر و هكذا .

شكرا حودا على المعلومات المهمة دي

اتمنى لك التالق الدائم

طرح رائع للموضوع احييك عليه يابو المزازيك

وبالتوفيق للوايت نايتس

» اتفرج على احلة اجوان للحراس المرمى يعنى من عمل يعمل